بحبك يا لبنان بس …

بقلم سامر م. الشدياق

(يسمح اعادة النشر على المدونة الإلكترونية أو في الصحف أو على أي من وسيلة اعلامية مطبوعة أو منشورة بإذن من الكاتب )

 

B7ibbak ya Lebnan Bass

كل كتاباتي تقريبا بالانكليزي, بس هل مرة حبيت اكتب بالعربي وباللبناني كمان… تيوصىلو كلماتي لا يللي بيحبوا مايسمعوا…

مش معقول قدي اللبناني بحب بلده لما ما يكون عايش في … لما يكون عم بيقول الله يلعن أبو الغربه مافي أحلى من لبنان … هو وعم يسمع فيروز عم بتقول : وحبة من ترابك بكنوز الدنيا يا لبنان يا وطني …

بس بنفس الوقت مش مستعد يرجع

مش معقول قدي اللبنانين بيلتفوا عا بعضن برات لبنان … بس بيبطلوا يعرفوا بعضن لما يرجعوا يلتقوا بلبنان

وبيكبر قلبهم لما يشوفوا علم بلدهم بدوله اجنبية إن شاء الله كان معلق على باب فندق مع 100 علم… بس ببلده بعلق علم المانيا أو البرازيل وبيبكي اذا خسروا بالفوتبول… وبينزل عالطريق تيحتفل إذا ربح…

مش معقول قدي بحب اللبناني يعمم… انه الأمريكي هيك والاوروبي هيك والاردني هيك واليهودي والفلسطيني والعربي والمسلم والسني والشيعي والمسيحي والياباني والصيني والسوري … و و و… وبيجمع كذا 100 مليون شخص بتحليله وتعميمه …

بس هو أصلا مش محتك مع ولا واحد منهم بيحايتو… ولا جرب يتعلم حضاراتهم وقيمهم أو تاريخهم… ولشو يعمل هيك أصلا طالما في تلفزيون وفي مسلسلات…

بحبك يا لبنان بس

عشت زمن حروب اكتر ماعشت بطمانينة وإستقرار وعمري بس 34 سنه

عشت لشوف أطفال اليوم عندن حقد وكراهيه لطوائف واحزاب ودول وبيحكوا بالسياسة وانا لما كنت بعمرن كنت إلعب مع جيراني واصحابي بالمدرسة بدون ما أعرف أصلا انه في شي اسمه طوايف…

عشت لشوف كل المؤمنين من جميع الديانات والطوائف بيجتمعوا على المساواة بالتعامل مع الملحد – أو الكافر حسب ما بيعتبروا – يللي عايش وما بـآمن حتى إنه في الله… بس مستعدين يتقبلوه أكتر بكتير من إنه يتقبله حدا من غير طايفتم.

عشت لشوف الناس مش مستعدين ينسوا خلافات عمرها عشرات وحتى مئات السنين … بس مستعدين ينسوا ناس ماتت من اسبوع واحد … وماحدا رجع جاب سيريتهن… حيطن كان واطي … وحياتهن ماكن إلها قيمة… وذنبهم انو كانوا بالمكان الغير مناسب في الوقت الغير مناسب … بس دموع اهلهم تبكيهم…

عشت لشوف كتير ناس بربحوا الله وملائكته وكل الناس يللي حواليهن جميلة بوطنيهم … بس مش مستعدين يظبطوا صفة سياريتهن بالموقف كرمال حدا يصف جانبن …

عشت لأتعرف على الدوله يللي بتخد وما بتعطي… بس الواسطة ممكن تعيشك بكرامه

عشت لاءنجبر اتعايش مع واقع انه شوف مسلحين عالطرقات وقنع حالي انه هيدا عادي… وإسمع رصاص وقول هيدا عادي بس ماعندي حق اسأل وين الدوله…

عشت لاتعايش مع دمعة أهلي يللي عمرن فوق السبعين يللي عم بيقولوا انه طول عمرو هيدا البلد هيك … وشوف حالي محلن عم شوف ابني وأقول لنفسي انه معقول موت قبل مايتطمن قلبي عليه بلبنان… بس لازم يدل عندي ايمان

عشت لشوف كل العالم محبطة وعندها عقد ومشاكل لفوق راسها ومعاد حدا طايق يشوف التاني كرمال مايزدله على همه بس بـشوف دعايات من الخيال العلمي تيجذبو سواح تيجوا ويتنعمو بحقوق ماعم يحصل عليها المواطن ببيته …

عشت وشفت احلام عم تتدمر وشركات عم بتسكر ومصالح بطعمي عيل عم بتأفلس …وبعد في ناس مستعده تضحي بكل شي كرمال دوله ثانية بحياة أبو ابوهم مادعسهـا… بس بعدني بدي إحلم ودافع عن الشي الوحيد يللي الله ميزني في عن الحيوانات…

عشت لودع اصحابي واحد واحد هني وعم يتركوا لبنان تيفتشوا على لقمة العيش والعدالة الإجتماعية ببلاد مابتشوف الشمس كل السنه أو ببلاد بتحرقك الشمس والصحرا فيها على مدار السنه… وانحرم من نعمة انو اسمع ضحكتن أنا وقاعد لوحدي… بس أهم شي انه روح انتخب …

عشت لما اعرف الحب الحقيقي في زمن الطوايف والملل والإنقسامات المذهبيه… ويقيموني مش عا اسس الإحترام والنجاح ومدى حبي لبنتهم وكيف باستطاعتي عييشها بعز وكرامه وشيلها فوق راسي … بس عاساس بيي من وين وشو طايفة جدو لجدي…

عشت وفتشت عالحب خارج البلد كرمال ماتجي مرتي مع مشاكل نفسيه وتعلملي أولادي انه المسلم أحسن من المسيحي أو الروم أحسن من الموارنه… بس للأسف طلعت أنا المعقد بالاخير…

عشت وشفت السياسين ورجال الدين بربحوك جميله انه هني يللي معن مفتاح باب الجنه وهني بس يللي بيمقدورن يعيشوك بكرامه… بس طلع مفهومن للكرامه هو اقل من الحقوق البسيطة يللي بيتمتع فيها خدم بيوتهم في بلادهم…

بحبك يا لبنان بس مابقى فيي كذب عحالي واقول… إذا نحنا تفرقنا بيجمعنا حبك…

بحبك يا لبنان بس همك تعبني كتير… وأنا بعدني عم بلش حياتي…

بحبك يا لبنان … بس…

Download the File and feel free to re-publish / re-distribute with permission from the author.

SC

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s